შალვა ამირანაშვილის ხელოვნების მუზეუმში დაცულია ქართული ხელოვნების ყველაზე ცნობილი ნიმუშები. აღნიშნული მუზეუმის სხვადასხვა კოლექციაში, დაახლოებით, 6 ათასი ნივთი ინახება. ყველაზე მნიშვნელოვან ექსპონატებად მიიჩნევა: ზარზმის ფერისცვალების ხატი, ბედიის ბარძიმი, ანჩისხატისა და ხახულის კარედები, ტონდო წმინდა მამაის გამოსახულებით, საწინამძღვრო ჯვრები და სხვ.
შალვა ამირანაშვილის ხელოვნების მუზეუმში ინახება, ასევე, ისეთი ცნობილი ქართველი მხატვრების ნამუშევრები, როგორებიც არიან: ნიკო ფიროსმანაშვილი, ლადო გუდიაშვილი, ელენე ახვლედიანი, დავით კაკაბაძე და სხვანი.
მუზეუმი მასპინძლობს რუსულ, დასავლეთ ევროპულ და აღმოსავლურ (უმეტესად სპარსულ) ხელოვნების ნიმუშებსაც.
